Siglir tar il cuntegn
cuntegn

Svizra Svizra en il cussegl da segirezza da l'ONU fiss tuttina neutrala

Il Cussegl federal ha approvà in rapport per la candidatura da la Svizra per in sez nunstabel en il cussegl da segirezza da l'ONU. Tenor il rapport na cunterfagess quai betg a la neutralitad.

logo da las naziuns unidas
Legenda: Tenor il Cussegl federal è la via en il cussegl da segirtad da l'ONU libera per ina candidatura svizra. Keystone

Il rapport ch'il Cussegl federal ha fatg sin incumbensa dal parlament suttastritga ch'in tal post avriss a la Svizra novas pussaivladads - surtut quai che pertutga la politica da l'exteriur sin il champ da pasch e segirezza.

Il mandat per questa candidatura aveva il Cussegl federal decidì il schaner 2011. 2 onns pli tard ha il Cussegl naziunal incumbensà il Cussegl federal da formular in rapport en chaussa cun resguardar la dumonda da la neutralitad da la Svizra. Il rapport sto uss vegnir approvà dal parlament. Lura candidescha la Svizra per in post nunstabel per la perioda dal 2023/2024.

Il cussegl da segirezza da l'ONU

Il cussegl da segirezza da las Naziuns unidas cumpeglia 5 commembers stabels ed ulteriurs 10 nunstabels.

Ils commembers stabels han era il dretg da veto. Pia la pussaivladad da bloccar ina decisiun dal cussegl da segirtad.

  • USA
  • China
  • Russia
  • Frantscha
  • Gronda Bretagna

Ils sezs nunstabels vegnan occupads danov cun elecziuns mintga 2 onns tras la radunanza generala da l'ONU. Quests èn repartgids sin gruppas regiunalas da l'ONU. Dretg sin in sez han

  • 3 sezs la gruppa dals stadis da l'Africa
  • 2 sezs la gruppa dals stadis da l'Asia
  • 2 sezs la gruppa dals stadis da l'America latina e da la Caribica
  • 2 sezs per la gruppa dals stadis da l'Europa dal vest ed ulteriurs stadis
  • 1 sez per la gruppa dals stadis da l'Europa da l'ost

RR novitads 15:00