Cumpareglià cun l’enquista d’avant in onn è quai in augment da 5%. La malcuntentientscha è la pli ferma tar ils electurs da partida populara svizra e tar las persunas tranter 55 e 64 onns. Il pli cuntent cun la politica èn ils giuvens tranter 15 e 24 onns. Tenor l'enquista vesan ils dumandads il grond basegn d'agir en la politica d'asil ed en la politica dad esters.
Taglia sin transacziuns
La gronda part da la populaziun en Svizra è dal avis che taglias sin transacziuns sin il martgà da finanzas duajan vegnir introducidas, il studi da Vimentis mussa che 58% fiss per ina tala taglia. E 52% dals Svizzers e las Svizras vesessan gugent ina participaziun finanziala da la Svizra per cumbatter pli effizient cuntrabandists d’umans.
Transparenza finanziala da partidas
74% dals dumandads sustegnan che finanziaziuns da partidas politicas che surpassan 10’000 francs duajan vegnir fatgas transparentas. Las partidas reageschan different sin quests resultats. Las partidas da la sanestra beneventan da far pli transparent la finanziaziun da partidas. Perencunter èn las partidas da la dretga plitost scepticas che quai basegnia talas reglas.
Retschertgas online n’èn betg represchentativas
A la retschertga online da Vimentis èn sa participadas 20’224 persunas. Quai scriva la plattafurma per infurmaziun politica Vimentis che vegn girada da sur 60 students. Ina retschertga online na sajan betg represchentativa, perquai ch’ils participants na vegnian betg elegi a moda casuala, scriva Vimentis. L’organisaziun ha dentant tenor atgnas indicaziuns fatg ina appel da participaziun en tuttas regiuns da la Svizra e selecziunà las participaziuns tenor criteris demografics, tenor schlattaina, chantun e scolaziun. La diffusiun statistica munta a plus/minus 4%.
RR novitads 14:00