Sche Franzosas e Franzos gudognan lur daners en Svizra, lura pajan els ina tscherta part da lur taglia a la Svizra (e viceversa). Formalmain han els lura in status da cunfinari u cunfinaria.
Durant il temp da corona han ins chattà ina schliaziun transitorica per il cas che persunas lavuran davent da chasa. Sch'ellas na lavuran betg dapli che 40% davent da chasa, lura mantegnan ellas vinavant il status da cunfinari.
Part d'ina cunvegna tranter la Frantscha e la Svizra
Tenor il Secretariat per dumondas da finanza internaziunalas è quella schliaziun uss vegnida acceptada d'omaduas partidas sco schliaziun fixa. Cun quai daventa ella part da la cunvegna da taxaziun dubla cun la Frantscha.
Era sche la cunvegna prevesa ch'il stadi svizzer profitescha da la taglia, duain er ils lieus en Frantscha, nua ch'ils lavurers abiteschan, survegnir ina tscherta cumpensaziun. Quant bler sto anc vegnir decidì.
Ina schliaziun transitorica sumeglianta cun l'Italia scada quest onn, senza ch'i dat vinavant ina regulaziun speziala per cas da home office.
