«Fake-news» e «pressa da manzegnas» paran betg dad esser tema tar las marcas da media en Svizra. En in studi ha la firma da perscrutaziun Publicom bain constatà tschertas variaziuns tar singulas marcas. La fidanza dal public envers las medias che vegnian duvradas en general saja però surprendentamain stabila.
Tar las marcas las pli crediblas tutgan gasettas regiunalas, ed ils radios ed emetturs che vegnan finanziads dal maun public. Marcas da boulevard e las medias socialas vegnan però taxadas marcantamain main crediblas. Questas sajan percunter pli divertentas.
NZZ, La Première e Rete Uno
Il medium surregiunal il pli credibel è tenor il studi la «NZZ». En la Svizra romanda èsi il program «La Première» ed en la Svizra taliana «Rete Uno» – omadus programs da la SSR SRG.
Surprendent è per Publicom però che la valitaziun tar persunas veglias e giuvnas è la medema. Uschia che la generaziun giuvna para era d'avair dapli fidanza en las marcas etablidas ch'en las marcas digitalas.
RR novitads 12:00