Siglir tar il cuntegn

Svizra Svizra ha dumbrà 35'000 utschels d'iert

A l'uschenumnada «ura dals utschels d'iert» han ins dumbrà quest onn passa 35'000 utschels da 127 spezias. Quai communitgescha BirdLife Svizra.

Il maset grond
Legenda: Il maset grond datti en var 74% da noss ierts. © Michael Gerber

Las annunzias sajan arrivadas da l'entira Svizra ord bunamain 1'200 ierts. Ils resultats mussian ch'i dettia spezialmain blers utschels en ierts natirals. En media vegnian dentant annunziads adina damain utschels, scriva BirdLife.

L'ura dals utschels d'iert è mintgamai l'emprima fin d'emna dal matg. Dapi l'emprima dumbraziun il 2015 è sa reducì cuntinuadamain la media dal dumber d'utschels per iert da 36 sin 30,5.

A la merlotscha suonda il maset grond

Il pli savens ves'ins la merlotscha. Ella pon ins contemplar en 90% dals ierts. Silsuenter suonda il maset grond (74%), il pasler da chasa (70%), giazla (58%) e lura cuacotschna da chasa (53%). Il 2015 han ins vis questas spezias anc bler pli savens en ils ierts, era qua han ins constatà ina sminuaziun.

L'iert ideal

Utschels dovran oravant tut vivonda, ina plazza da gnivar e duessan esser protegids da disturbis. Impurtant sco vivonda èn insects sco era sem e graun. Per ils utschels è in iert cun plantas veglias fitg impurtant, bostgs indigens, in pitschen prà da flurs ed ina funtauna.

RR novitads 10:00