Svizra - Svizra ha vinavant ina buna reputaziun en l'exteriur
Er quest onn ha la Svizra pudì confermar sia buna reputaziun. Tar la populaziun da l'exteriur giauda la Svizra gronda stima. Quai resulta dal Nation Brands Index. En quel cuntanscha la Svizra danovamain plazza 8 da 50 pajais.
La regenza e l'auta qualitad da viver valan sco fermezzas da la Svizra, communitgescha l'organisaziun da marketing da la confederaziun Präsenz Schweiz. Per chavazzins positivs en las medias haja procurà en spezial il sport. Commentà criticamain han las medias da l'exteriur l'aboliziun dal curs minimal da l'euro.
