L'emna passada aveva la chombra pitschna decidì d'impunder maximalmain 60% da la taglia sin petroli per il traffic sin via. Cun il spazi engiu vers leva il Cussegl dals chantuns evitar che tscherts auters secturs vegnian a la curta.
En il Cussegl naziunal n'ha questa proposta però chattà nagina maioritad. Cun 124 cunter 61 vuschs ha quel decidì da scriver ils 60% fix en la lescha. Uschiglio dettia in spazi da 300 milliuns francs. Ils projects da cumplettaziun sajan uschia ni uschia finanziads plitost magher uschè ch'i vegnia probabel tuttina duvrà tut ils daners.
Spazi regalà
Ils aderents per la proposta en il Cussegl naziunal han argumentà ch'i fetschia nagin senn da vulair pachets cun mesiras da spargn ed il medem mument stritgar la pussaivladad per reducir ils custs. Era la ministra dal traffic Doris Leuthard discurra d'in tractament malgist. Tut las autras expensas sajan suttamessas al parlament.
Il project da votaziun turna tar il Cussegl dals chantuns
Era tar la segunda differenza è il Cussegl naziunal restà dir. Cun 106 cunter 97 vuschs impedescha el ch'il Cussegl federal possia adattar la taglia sin il petroli a la chareschia.
Cun quai va la fatschenta puspè enavos en il Cussegl dals chantuns. Il project duai vegnir reglà durant questa sessiun che marscha.
Pertgè NAF?
Cun il NAF vul il Cussegl federal ina finanziaziun sufficienta e durabla ch'è analoga al fond d'infrastructura da la viafier. Cun quests daners duai vegnir mantegnì autostradas. Era la rait naziunala da traffic duai uschia vegnir finida e stretgas duain vegnir schliadas. L'uschenumna decret da la rait è er cuntegnì en quest project. Cun quest decret duai la Confederaziun surprender 400 km vias dal chantuns.
RR novitads 10:00