Concret duaian vegnir preschentadas ideas innovativas per mantegnair il commerzi liber e per promover la protecziun da l'ambient. Cun quai sa metta il Forum mundial d'economia (WEF) cleramain cunter la politica dal president american. Quel propaghescha ina politica d'isolaziun e vul manar ils Stadis Unids or da la cunvegna dal clima da Paris. Ma era la situaziun da la Uniun europeica (UE) duai vegnir observada.
Ina spezialitad dal Forum mundial d'economia (WEF) è ch'ils sis Co-Chairs vegnan ad esser occupads cumplettamain da dunnas. Ils Co-Chairs gidan a sviluppar il program ed a manar las discussiuns. Previsas sco Co-Chairs èn tranter auter la schefa dal Fond monetar internaziunal (FMI) Christine Lagarde, l'emprima ministra norvegiaisa Erna Solberg e la schefa da la IBM Ginni Rometty.
RR novitads 16:00