Arrivederci Piazza Grande
Pharrell Williams è uschia u uschia happy, Breitbild è happy cun ses concert e nus essan happy d'avair pudì esser stadas ad ina saira da concert nunemblidaivla. Dentant, uss ha quai num «arrivederci Moon and Stars, arrivederci Piazza Grande, arrivederci sole» ed i restan mo pli las regurdanzas. Uss ans spetga la naiv en il Grischun…
Breitbild – suenter il concert
Cun fatschas rientas e plain energia èn ils commembers da la band Breitbild suenter lur concert en il backstage. Ch'il concert ha plaschì ad els, gliez ves’ins sin l’emprim'egliada. E quai conferman alura era tuts ad RTR, i saja stà in dals megliers concerts che la band haja gì dapi lur fundaziun l’onn 1999. E quai malgrà ch'els sappian ch'ils blers fans na sajan betg qua pervi dad els, mabain pervia da l'act principal che vegn gist suenter, numnadamain Pharrell Williams.
Il soundcheck cun Breitbild
Entant che PharreIl Williams na fa betg sez il soundcheck fa quai Breitbild. Pervi da ferma plievgia ha il soundcheck stuì vegnir spustà per 30 minutas. Tenor Vali da Breitbild saja quai in motiv per vegnir gnervus sch’insatge na funcziuna betg tenor plan. Dentant gnervus saja el era sche tut funcziuna. Quai audia simplamain tiers. El s’allegra dentant da pudair chantar questa saira sin la Piazza Grande.
El ha gia vis tuts. Davos las culissas ha Patric Lechmann gia lavurà per ils pli renumnads artists sco Michael Jackson, Joe Cocker, David Bowie ni Madonna. El è il manader da l’infrastructura al Moon and Stars, quai gia dapi 10 onns. A Locarno vegn el perquai savens numnà la legenda. Ma el na vesa betg sasez sco ina legenda. Per Patric Lechman, oriund da Vella, saja quai ina lavur tut normala.
Jau vai senza vulair fatg la tgagia ad Angus Young da AC/DC.
La Piazza Grande a Locarno
L’avantmezdi na marscha anc betg las massas sin la Piazza Grande a Locarno. L’entira infrastructura è gia pronta. Sulet intgins lavurers èn anc vid ils davos detagls tecnics sin la tribuna. Ord la boxas vegn musica, il mument dentant anc da bass. La Piazza Grande è il mument plitost vita. Ils emprims visitaders ed ils turists ch’èn gia a Locarno sa chattan plitost en ils cafés e restaurants.
-
Bild 1 von 10. L'avantmezdi èsi anc ruassaivel a La Piazza Granda. Bildquelle: RTR, Silvana Degonda.
-
Bild 2 von 10. La tribuna vegn preparada per la gronda show. Bildquelle: RTR F. Caduff.
-
Bild 3 von 10. Patric Lechmann, l'um da l'infrastructura, ha fatg in'intervista live en il radio. Bildquelle: RTR, Silvana Degonda.
-
Bild 4 von 10. Durant il di era la pli bell’aura ed uss tuttenina vegn la plievgia. La tribuna vegn pachetada en. Bildquelle: RTR, Silvana Degonda.
-
Bild 5 von 10. Durant il concert da Breitbild passan ils nivels plaunet. Bildquelle: RTR, Fabia Caduff.
-
Bild 6 von 10. Fabia Caduff en discurs cun Claudio e Vali da Breitbild suenter lur concert. Els sun happy. Bildquelle: RTR, Silvana Degonda.
-
Bild 7 von 10. Durant il concert da Pharrell Williams è la Piazza Grande plaina. Bildquelle: RTR, S. Degonda.
-
Bild 8 von 10. Suenter ils concerts è la Piazza Grande puspè tut vida - vista da la tribuna. Bildquelle: RTR, Fabia Caduff.
-
Bild 9 von 10. Quai è la stiva Grischuna da Patric Lechmann, che sa chatta davos la tribuna. Qua èn gia stads intgins stars a baiber gervosa cun el. Bildquelle: RTR, Fabia Caduff.
-
Bild 10 von 10. Arrividerci Moon and Stars - igl è stà bel! Bildquelle: RTR, Fabia Caduff.
Concerts dals 13 da fanadur
Breitbild
La band Breitbild è la mesemna saira stada il giast spezial sin la tribuna dal Moon and Stars. Breitbild èn Andri, Claudio, Vali e Thom da Cuira. Els fan musica da hip-hop dapi il 1999. Suenter sis onns pausa èn els ussa puspè enavos cun il nov album «Breitbild».
Pharrell Williams
Cun il hit «Happy» ha Pharrell Williams fatg sautar persunas l’entir mund. Al Moon and Stars ha el dà in concert exclusiv. El ha era gia producì chanzuns per auters musicists sco Britney Spears, Miley Cyrus u Madonna.
13avla ediziun dal Moon and Stars
Al Moon and Stars datti concerts d'interprets cun num internaziunal e naziunal da pop e da rock. A tadlar ils concerts vegnan onn per onn fin a 120’000 persunas. Quest onn vegn quest festival organisà per la 13avla giada sin la Piazza Grande a Locarno.
RR actualitad 11:00