Anc il matg aveva l’uvestg Vitus Huonder empermess d’examinar la dumonda e da preschentar ils plans a la conferenza da Biberbrugg, la reunin da las set baselgias chantunalas da l’Uvestgieu da Cuira. Ussa han sis dallas set baselgias chantunalas detg na a quests plans da Turitg.
Ins na po betg ir cun il chau tras ils mirs.
«Turitg na po betg persequitar vinavant la finamira d’in agen uvestgieu, sche tut ils auters chantuns n’èn betg d’accord cun questa via», di il president dal Cussegl sinodal da Turitg, Benno Schnüriger e conferma uschia in artitgel dal «Tages-Anzeiger».
Betg in segund Vitus
Trumpà n’è Schnüriger dentant betg propi, co el ha confermà sin dumonda da Radio SRF. El haja schizunt chapientscha per ses collegas, ch’han tema sche Turitg bandunass l’uvestgieu da Cuira. Pertge senza la baselgia dal chantun Turitg, dessi forsa problems finanzials per l’uvestgieu.
A tut ils catolics turitgais che fissan gugent sa separads da l’uvestgieu conservativ, cusseglia el d’avair pazienza. Pertge en dus onns giaja l’actual uvestg da Cuira en pensiun ed el na crai betg ch’i suonda in segund Vitus Huonder: «Nus essan da l’avis ch’i vegnia lura elegì in nov uvestg, che resguarda meglier ils interess da Turitg, che quai che l’uvestg Vitus Huonder ha fatg.»
Sperar da pudair martgadar cun Roma
E fin ch’igl è lura uschè lunsch en dus onns, spera Reto Schnüriger che Roma vegnia a lubir in uvestg auxiliar – in substitut ecclesiastic. Sch’i na dat schon betg in uvestgieu Turitg, lura «è quai noss emprim giavisch», uschia Schnüriger. «E noss segund giavisch è che Turitg ha dapli influenza en chapitel cura ch’i va per decider, tgi che quai uvestg auxiliar duai esser.» Segns da Roma ch’i pudess ir en questa direcziun na datti dentant anc nagins.
Discussiuns gia dapi prest 40 onns
Il 1980 ha la Conferenza dals uvestgs per l’emprima giada stuì tracta la dumonda, sch’ins duai crear trais ulteriurs uvestgieus en Svizra: in per Genevra, in per Turitg ed in per la Svizra centrala cun sedia a Lucerna. Il 2015 ha la Conferenza dals uvestgs tractà da nov quella dumonda cun resguardar quella giada novs uvestgieus a Turitg e Genevra.
RR actualitad 17:00