Bunamain 16 onns suenter il cumenzament da las tractativas è la cunvegna da commerzi liber dals stadis da l'EFTA cun l'India vegnida suttascritta la dumengia a Delhi. La suttascripziun saja in term impurtant da la politica da commerzi svizra, ha il Departament federal per economia, furmaziun e perscrutaziun (WBF) communitgà la dumengia.
Mess lur suttascripziun sut la cunvegna han il minister d'economia Guy Parmelin, ses collegas d'uffizi da l'EFTA ed il minister da commerzi da l'India Piyush Goyal. Il primminister da l'India Narendra Modi e la presidenta da la Confederaziun Viola Amherd han accumpagnà la suttascripziun cun messadis da video.
A la Svizra ed als auters stadis da l'EFTA – l'Islanda, il Principadi dal Liechtenstein e la Norvegia – saja gartegià da far sco emprim partenari europeic ina convenziun da commerzi liber cun l'India, ha scrit il WBF. La finamira saja che la Svizra possia ratifitgar la cunvegna il pli tard il 2025.
Cunvegna che empermetta bler
En il decurs dals onns saja vegnì stabilì cun l'India ina relaziun da confidenza extraordinaria, ha declerà Parmelin sin la plattafurma X. Cun sia economia che creschia rasantamain e cun il martgà gigantic, dettia l'India grondas pussaivladads da commerzi e d'investiziun per interpresas svizras. «Questa cunvegna vegn da bun a milliuns d'umans e fullar via ad in futur economic empermettent per tuts», uschia il minister d'economia.
La presidenta da la Confederaziun Amherd da sia vart ha declerà sin X, che cun la cunvegna dettia dapli pussaivladads per interpresas svizras, novas investiziuns vegnian animadas e plazzas da lavur d'auta qualitad promovidas.
Levgiament per l'economia d'export
L’India è entant il pajais cun la pli gronda populaziun dal mund. Fin ussa aveva l’India incassà sin la gronda part dals products dazis d’import fitg auts. Cun la cunvegna da commerzi liber vegn l’India ad annullar u liberalisar parzialmain las tariffas da dazi per 95,3% dals imports da products industrials da la Svizra (senza aur).
Suenter ina perioda transitorica da fin 10 onns survegn la Svizra ultra da quai access liber da dazi al martgà indic per products agriculs tschernids. Tras quai vegn rinforzada la cumpetitivitad d’exports svizzers en l’India. Las concessiuns da la Svizra a l’India per products agriculs s’orienteschan tenor il WBF vi da las cunvegnas da commerzi liber da fin uss e sa chattan en il rom da la politica agrara svizra.
Cun la nova cunvegna datti era meglieraziuns tar ils dretgs da proprietad intellectuala. L’access a medicaments en l’India na vegn betg restrenschì en quest connex.
Grazia a la convenziun da commerzi liber pudessan ils exportaders svizzers profitar da respargns annuals da duana da fin 166 milliuns francs, ha il Secretariat da stadi per l'economia (Seco) quintà.
Las associaziuns d'economia svizras han beneventà che la cunvegna da commerzi liber da l'EFTA cun l'India è vegnida suttascritta. L'uniun tetgala d'economia Economiesuisse ha numnà la suttascripziun sin la plattafurma X sco term impurtant per la naziun d'export Svizra. L'EFTA e l'India hajan cun quai mess in signal cler cunter isolaziun e protecziunissem.
In sboz da text definitiv è necessari
Pli discreta è s’exprimida la dumengia la federaziun Scienceindustries che represchenta las branschas chemia, farma e scienza da vita. «Sch’i vegn fatg endretg po ina convenziun da commerzi liber cun l’India esser in pass impurtant per il lieu economic svizzer, per avair meglier access al martgà indic», vegn cità il directur da Scienceindustries Stephan Machimer en ina communicaziun.
Sco pli gronda industria d’export saja l’industria chemica-farmazeutica dependenta spezialmain ferm da l’access global a martgads da vendita relevants. In giudicament final da la convenziun da commerzi liber saja dentant pussaivel pir suenter ch’il sboz definitiv dal text saja avant maun. Per Scienceindustries saja quai impurtant ch’il pachet general constettia.
Per la federaziun da l’industria da tecnologia svizra Swissmem è la conclusiun da la cunvegna da commerzi liber «in radi da speranza en ina fasa difficila per las interpresas d’export». Dazis d’enfin 22% crudassan uss davent. La cunvegna megliereschia considerablamain la cumpetitivitad da l’industria da tecnologia svizra en quest impurtant martgà da creschament.