Enfin ch’ils trens regulars charreschan tras il tunnel da basa da la Neat dura quai anc pli ch’in onn. L’AlpTransit Gotthard SA ha dentant envidà las medias per infurmar davart il stan actual da las lavurs, e quai cun laschar far il viadi fin amez il tunnel ed enavos. Quai è l’ultim viadi fin l’avertura uffiziala il 1. da zercladur 2016. A partir da l’october fin il matg vegn numnadamain testà il tunnel. Quai vegn fatg cun laschar charrar atras trens adina pli svelt atras il tunnel e far mesiraziuns. I vegn dentant era testà il sistem da diriger il traffic ubain ils sistems da segirtad. Tut sto vegnir protocollà per uschia pudair mussar si ch’i funcziunescha. Durant quest temp na po il tunnel betg vegnir visità.
En funcziun il december 2016
Davent dal zercladur 2016 cumenzan las Viafiers federalas lura a laschar cursar trens tras il tunnel, dentant betg il traffic regular. Uschia vegnan trens da vitgira sviads da la ruta usitada via il tunnel da basa. Il medem po era capitar cun trens da persunas. Ils passagiers vegnan lura infurmads ch’i vegnian manads tras il tunnel da basa. Tenor l’ApTransit Gotthard SA vegnan las Viafiers federalas era a porscher la pussaivladad dad ir explicit tras il tunnel. Co questas purschidas vesan ora n’è betg cler. Las Viafiers federalas han uschia temp da rimnar emprimas experientschas e d’emprender d’enconuscher il tunnel e tut ils sistems, avant ch’el vegn prendì en funcziun cun la midada d’urari il december 2016.
