L’Uniun da las Associaziuns europeicas da ballape na boicotteschia betg il congress da la Fifae l'elecziun dal president, ha Platini ditg suenter in inscunter cun Blatter. La Uefa na vegnia dentant betg a sustegnair Blatter.
La Uefa smanatscha
Vinavant na sclauda Platini betg, da retrair las equipas europeicas ord tuttas concurrenzas da la Fifa, sche Sepp Blatter vegniss reelegì. Platini ha ditg, ch'ins vegnia a discutar tuttas pussaivladads en ina seduta l'emna proxima.
Betg tuts èn cunter Blatter
Las confederaziuns da l'Africa e da l'Asia han gia communitgà, ch'ellas sajan cunter da spustar l'elecziun dal president. Ellas han danovamain fatg a savair da vulair sustegnair Blatter. Il president da la Fifa, Sepp Blatter, aveva clamà l'avantmezdi ad in inscunter urgent, cun tuttas 6 confederaziuns continentalas da la Fifa.
