Il cunfin da vegetaziun vegn a sa stuschar ensi per 500 fin 700 meters. Pervi da setgiras e las temperaturas pli autas vegn era il privel per incendis da guaud a crescher ma er a promover dapli parasits en il guaud, quai scriva ils perscrutaders en quest studi.
Ils ultims 150 onns èsi vegni per 1,8 grads pli chaud
Las temperaturas en Svizra èn dapi 1864 s’augmentadas per radund 1,8 grads. Era sche finamiras da clima vegnissa realisadas èsi da quintar cun ulteriurs in ni dus grads pli chaud. Il medem mument vegnan las plievgias la stad a s’augmentar tut tenor model per tschintg fin 25%.
Da guauds da dascharina tar guauds da feglia
Uschia quintan ils experts che questa midada ha grondas influenzas sin las plantas. En regiuns da guauds da muntogna pli bassas vegn quai a dar en futur dapli plantas da feglia. Uschia saja per exempel il pign periclità. El saja pli periclitads dal bau da scorsa e na possia betg pli crescher en regiuns pli bassas. En questas regiuns vegnia a crescher en futur plantas che cumportian meglier la setgira, sco per exempel il ruver tardiv, scriva ils experts.
Guauds pudessan perder la funcziun da protecziun
Questa midada dal clima ma cunzunt la sveltezza che questa midada vegnia saja in privel per ils guauds da protecziun. Probabel n’è il guaud betg abels da dar dumogn a questas midadas senza l’agid dal uman, scrivan ils perscrutaders.
Il program da perscrutaziun «guaud e clima» è vegni lantschà il 2009 dal Uffizi federal d’ambient en collavuraziun cun l’institut federal per la perscrutaziun da guaud, naiv e cuntrada. Il project duai esser a fin il 2017. La finamira era da elavurar savida da basa sur da las consequenzas da la midada dal clima per il guaud e da elavurar strategias che pon dar in agid en la pratica.
RR novitads 15:00