Sin l’emprima egliada fa quai augment surstar. Las cifras publitgadas mussan numnadamain era ch'i ha dà en Svizra dapli mortoris e pli paucas naschientschas l'onn passà. Omadus svilups sajan probabel d'attribuir al coronavirus, scriva il BfS. Ch'i haja tuttina dà in augment da la populaziun haja da far cun l'immigraziun. 162'974 persunas èn sa chasadas da nov en Svizra, 106’490 han bandunà ella. Sut il stritg resta uschia in surpli da 56’484 persunas.
Era il Grischun cun in plus
Creschida è la populaziun era en il Grischun. La fin da l’onn passà han ins dumbrà 200'050 abitants, 1’029 persunas dapli ch'il 2019. Era qua ha l'augment da far cullas persunas ch'èn vegnidas da nov ad abitar en il chantun. Tenor il BfS ha il Grischun numnadamain dumbrà dapli mortoris (1’801) che naschientschas (1’633) l'onn passà.
