Schegea ch’ils aderents èn per il mument en avantatg cun 21%, quintan ils politologs che l’iniziativa vegnia refusada piz a cup – quai en vista a la participaziun. Las opiniuns n'èn anc betg fatgas perquai che mo 43% dals burgais cun dretg da vuschar fissan ids a l’urna.
Polarisaziun è gronda
La polarisaziun da las partidas è considerabla. A la basa da la partida Verd-liberala èn 95% per l’atgna iniziativa, be 5% èn cunter. Er tar la PS dominescha il gea cleramain cun 70% cunter 16%. Tar la PCD è er il gea en la maioritad cun 58%, resistenza datti là da 35%.
Tar la PLD e la PPS èsi la maioritad da las persunas che vulan ir a votar cunter l’iniziativa. Tar la partida populara è la refusa gia considerabla, tar la basa dals Burgais-democrats sa mussa la situaziun però anc dividida.
Tge vul l'iniziativa?
L'iniziativa «Per l'abandun da l'energia nucleara» pretenda che las ovras atomaras vegnian tschentadas giu il pli tard suenter 45 onns en funcziun. Vegniss l'iniziativa acceptada, lura stuessan Beznau I e II sco er Mühleberg vegnir tschentads giu il 2017. Gösgen giess il 2024 da la rait, Leibstadt il 2029. En votaziun va l'iniziativa ils 27 da november 2016.
Las explicaziuns dal Cussegl federal
Ils arguments dals adversaris
Per ils adversairs da l'iniziativa è il termin memia resolut. Uschia vegniss gia il 2017 a mancar radund in terz da l'energia nucleara che vegn producida oz. Quai correspunda al diever d'energia annual da radund 1,6 miliuns chasadas. Questa cumpart na po tenor ils adversaris betg vegnir remplazzada spert avunda cun energia regenerabla indigena. Uschia stuess la Svizra importar bler dapli energia da l'exteriur - e quai fiss energia d'ovras atomaras e da charvun, uschia ils adversaris.
Ils arguments dals adherents
Per ils iniziants è il manaschi d'ovra atomaras memia privulus, in super-GAU na saja er betg da sclauder en Svizra. Il provediment da l'energia betg periclità cun abandunar l'energia nucleara. Cun energia indigena, e cun importar energia da l'aua, dal sulegl, dal vent e da biomassa pudess l'energia atomara vegnir remplazzada favuraivel al clima. Cun in gea a l'iniziativa survegnissan las interpresas ed il maun public segirezza quai che pertutga il planisar e las investiziuns da las energias regenerablas. La midada da l'energia stgaffetschia plazzas e saja uschia er ina schanza economia, punctueschan ils iniziants.
RR novitads 17:00
