Siglir tar il cuntegn
Inhalt

Svizra Svizra: Mintga 6avel uffant è periclità da povradad

La quota da povradad è cunquai tar 5%. Quai resulta da las cifras dal 2014, che l'Uffizi federal per statistica ha publitgà.

pantoflas cun foras.
Legenda: Povradad dad uffants - en Svizra vivan 234'000 uffants en chasadas cun pitschen spazi d'agir finanzial. Keystone

Central per che uffants na vegnan betg pertutgads è ch’ils creschids, che vivan en la medema chasada, hajan lavur.

En chasadas cun creschids senza lavur è mintga segund uffant periclità e mintga tschintgavel uffant pertutgà da povradad.

Mintga 20avel uffant en Svizra viva en povradad

Var 30% dals uffants ch’èn pertutgads da povradad vivan en ina chasada cun creschids, ch’han nagina lavur. Ils ulteriurs 70% - quai èn passa 51’000 uffants en Svizra – vivan en chasadas, nua ch’ils creschids na survegnan tras lur lavur betg avunda raps per pudair viver sur quai ch’è il cunfin da povradad.

Povradad da l’uffant periclitescha sia vita sco creschì

Dad esser pover sco uffant è in factur da ristg per tut la vita. Uffants periclitads u schizunt pertutgads da povradad n’han betg las medemas pussaivladads, da prender part vi da la vita u sa sviluppar en ella. Il studi sa basa sin las cifras da povradad e stgarsadad materiala da l’onn 2014.

Situaziun en grondas parts da l'Europa anc pli nauscha

Cumpareglià cun auters pajais europeics è la situaziun èn Svizra però relativamain positiva. Sumegliant u in zic meglier sco en Svizra vai sulettamain cun ils uffants en pajais da la Scandinavia ed en ils Pajais Bass.

RR novitads 10:00