Siglir tar il cuntegn
cuntegn

Svizra Svizra na suttascriva betg cunvegna da basa cun UE … anc betg

Legenda: Tadlar il audio Saira: Cussegl federal preschenta cunvegna da basa cun l'UE. Durada 01:04 minutas.
01:04 min, Actualitad dals 07.12.2018.

Il Cussegl federal na di ni gea ni na a la cunvegna da basa negoziada cun l'Uniun europeica (UE). El ha decidì da spetgar la debatta sin plaun naziunal. En la procedura da consultaziun pon prender posiziun chantuns, partidas, partenaris socials ed organisaziuns pertutgadas. Senza tal sustegn avessia la cunvegna paucas schanzas en la votaziun dal pievel.

Anc adina craps da stgarpitsch

Il text da la cunvegna mussa ch'i dat pliras differenzas, e che lingias cotschnas dal Cussegl federal vegnan surpassadas. Per exempel quai che pertutga la protecziun da pajas cun mesiras flancontas, ubain era ch'i vegniss pli simpel per persunas da l'UE da retrair agid social.

Per l'Uniun europeica è la proposta finala

L’UE haja però punctuà cler e bain da betg esser pront da negoziar vinavant. E sche quai fissia tuttina necessari, lura gist l'entira cunvegna, cun in nov mandat e betg avant la stad 2020. Il Cussegl federal vul restar en discussiun cun l'UE.

Entant datti gia las emprimas reacziuns

Las associaziuns d’economia speran ch’ins possia schliar ils puncts da dispita. L’access al martgà da l’UE stoppia vegnir segirà, uschia EconomieSuisse.

Las partidas percunter beneventan la decisiun da betg suttascriver. Quai dentant per differentas raschuns. La PLD e la PCD sustegnan la decisiun da laschar consultar differentas gruppas il sboz. La PS punctuescha da vulair nagina reducziun tar la protecziun da las pajas – La PPS na vul insumma nagina cunvegna.

RR novitads 17:00