Il dumber da sgols è restà pressapauc sco ils ultims onns. Ils aviuns eran dentant pli gronds ed en media er occupads meglier. Gia il 2014 aveva la plazza aviatica nudà in record cun surpassar la marca da 25 milliuns passagiers.
Mintg'aviun cun media da 114 passagiers
L’onn 2015 han totalmain 26’281’228 passagiers fatg diever da l’eroport Turitg. En media eran tar mintga sgol 114 persunas a bord dals aviuns, quatter dapli ch’il 2014. Il grad d’utilisaziun da plazs da seser è s’augmentà levamain per 1,2% sin 76,8%. Latiers hai er gì dapli plazs da seser (+1,9%).
Radund 265’000 aviuns èn sgulads davent u atterrads a Turitg; dapli che la mesadad dals aviuns eran maschinas da la Swiss (54,6%). Sin plazza dus sa chatta Air Berlin, lura Edelweiss Air, German Wings e sin plazza tschintg las British Airways.
RR novitads 06:00