L'Uffizi federal da traffic tira consequenzas ord las afferas da l'AutoDaPosta SA e da la BLS. Cun dapli surveglianza vul l'uffizi garantir che las interpresas da transports dovran las subvenziuns a moda correcta.
Cun il nov sistem desista l'Uffizi federal da traffic dad ina mesira da fin uss ed introducescha percunter 5 novas mesiras. Uschia stritga l'uffizi l'examinaziun punctuala dal quint annual parzial da las interpresas da transport.
Nov datti persuenter:
- In controlling extendì en il traffic da persunas regiunal subvenziunà. Divergenzas tranter budget e quint annual vul l'uffizi uschia pudair analisar pli profundamain.
- Las interpresas duain vegnir obligadas da far acziuns da verificaziun. Ellas ston incumbensar lur post da revisiun extern cun questas controllas.
- Interpresas che survegnan pli che 10 milliuns francs subvenziuns, ston far in'autodecleraziun ch'els dovran a moda correcta las subvenziuns.
- L'Uffizi federal da traffic metta a disposiziun dapli resursas per cussegliar las interpresas, co quellas impundan correctamain las subvenziuns.
- Ultra da quai vul l'uffizi cumplettar ses controlling cun provas da controlla pli profundas.
Las novas mesiras pon tenor l'Uffizi federal da traffic entrar en vigur per immediat.
RR novitads 11:00