Scienziads han identifitgà ina nova varianta dal virus da SARS-CoV-2, pia dal coronavirus, ch'è sa derasada ils ultims mais en grondas parts da l'Europa. Tranter auter hajan las schluccadas da las mesiras da viagiar chaschunà che la nov varianta haja pudì sa derasar uschè svelt e bain.
La varianta nova è il mument quella dal coronavirus ch'è il pli dersada en Europa, scriva l'Universitad da Basilea. Il mument existan tschients differentas variantas che sa differenzieschan entras pitschnas mutaziuns en ils gens. En Svizra tutgan radund 30 fin 40% da las sequenzas da gens examinadas tar la nova varianta.
Las analisas dals scienziads da l'Universitad da Basilea, da l'ETH Turitg e dal consorzi «SeqCOVID-Spain» mussian che la nova varianta, cun num 20A.EU1, è probablamain cumparida l'emprima giada la stad en Spagna.
Eveniment da superspreader stà a l'entschatta
Ils emprims indizis da la nova varianta stattan en connex cun in eveniment da superspreader tranter lavurers agriculs en il nordost da la Spagna. Suenter è la nova varianta sa derasada svelt en l'entir pajais ed è er vegnida en auters pajais europeics, sco era a Hongkong ed en Nova Zelanda. Ils scienziads supponan che las schluccadas da viagiar e da tegnair distanza durant la stad han levgià al virus da sa derasar.
Malgrà che la prevalenza da la varianta nova crescha parallel tar il dumber da cas da corona, na saja la nova varianta betg la raschun per il dumber che crescha per il mument puspè uschè ferm.
Naginas indicaziuns ch'il virus saja pli donnegius
Per il mument na datti naginas indicaziuns che la varianta nova saja pli donnegiusa e chaschunia in decurs da la malsogna pli grev. Ella na saja er betg pli contagiusa, ha declera l'epidemiologa Emma Hodcroft da l'Universitad da Basilea.