La qualitad da l'aria è strusch sa midada l'onn passà cumpareglià cun l'onn 2020 e vala vinavant sco buna. Quai sa resulta dal rapport annual dad «Ostluft» che mesira la qualitad da l'aria sin incumbensa dals chantuns Grischun, Appenzell Dador, Appenzell Dadens, Glaruna, Son Gagl, Schaffusa, Turgovia, Turitg e dal Liechtenstein.
Schebain las limitas da pulvra fina sco er tar il dioxid da nitrogen (NO2) èn aifer las limitas. Sur las limitas èn dentant las mesiraziuns dad ozon, amoniac e da fulin.
Pli pauca energia fossila – megliera aria
Las raschuns per la buna qualitad d'aria èn cleras: La tendenza positiva cuntinuescha surtut grazia a las limitas pli rigurusas che valan per svapurs tar vehichels a motor e grazia ad adina dapli vehichels electrics.
E tuttina hajan las concentraziuns in'influenza sin la sanadad, scriva «Ostluft». Qua na saja betg mo la concentraziun da singulas substanzas nuschaivlas decisiva, mabain magari era la cumbinaziun.
