Oscar Freysinger è candidat per il Cussegl federal. La Partida populara svizra Vallais Sut ha annunzià uffizialmain sia candidatura a la PPS svizra. Freysinger ha 55 onns ed è dapi dus onns en la regenza vallesana. Avant er'el stà durant 12 onns en il cussegl naziunal.
Ultra da quai vegn spetgà che la PPS Vad vegn ad annunziar la candidatura dal cusseglier naziunal Guy Parmelin.
Las secziuns chantunalas han temp enfin venderdi d'inoltrar lur propostas a la cumissiun responsabla. Fin ils 20 da november vegn lura la fracziun da la PPS en chasa federala a fixar ils candidats uffizials. L'elecziun è ils 9 da december 2015.