Impuls fallads, proceduras birocraticas ed ina qualitad dal tractament damain buna. Quai è la critica dals ospitals envers l'intervenziun dal Cussegl federal en la structura da tariffas Tarmed.
La raschun principala per refusar l'intervenziun statala è tenor l’uniun d'ospitals H+ il deficit pli grond che sa mussa en la sparta ambulanta dals ospitals e da las clinicas. Quel vegnia a crescher da 600 milliuns francs sin 900 milliuns ad onn. Cunquai ch'ils medis hajan damain temp per cas urgents sco era per glieud pli veglia, uffants e per la psichiatria, tema H+ era deficits tar la qualitad dal tractament.
Ospitals proponan novas pauschalas
Ils ospitals proponan d’introducir pauschalas per cuvrir ils cust tranter visitas staziunaras al ospital e visitas ambulantas. Tenor H+ fissi uschia pussibel d’augmentar la qualitad e l’effizienza dals tractaments. Ultra da quai pudessan dapli operaziuns vegnir fatgas ambulant.
RR novitads 12:00