Cuntrari a blers auters pajais èn las pajas bassas bain creschidas ils ultims onns en Svizra. En il medem temp èn però las pajas autas e fitg autas creschidas surproporziunal. Tenor il rapport da l'Uniun sindicala davart la repartiziun da gudogn e facultad, datti actualmain 14'000 persunas en Svizra cun ina paja da sur in mez milliun francs. Mez dals onns 1990 eran quai anc 3'000 persunas.
Repartiziun malgista
Anc pli malgista è la repartiziun da la facultad. Uschia possedan 1% da la populaziun en Svizra 42% da la facultad cumplessiva. Aifer 10 onns è questa cumpart creschida per 6 puncts procentuals. Tar l'inegualitad da la repartiziun da facultad occupia la Svizra pia in dals emprims plazs, ha declerà Paul Rechsteiner, il president da l'uniun, la gievgia a Berna.
Vitiers vegnia ina politica d'impostas e taxas malgista. Quella haja ils ultims onns surtut persequità ils interess da la classa sociala superiura, ha explitgà il schef-econom da l'Uniun sindicala, Daniel Lampart. D'ina vart levgeschian reducziuns dad impostas surtut las pajas autas. Da l'autra vart strapatschian las premias da cassas da malsauns surproporziunalmain las pajas bassas.
2 fin 2,5% dapli paja
L'Uniun sindicala bilantschescha che la politica dad impostas e taxas maglia si per gronda part ils auzaments da paja. Er sche las pajas sajan creschidas ils ultims onns, haja la maioritad da las persunas cun pajas bassas e mesaunas betg dapli per viver che l'onn 2000. Perquai pretenda l'Uniun sindicala svizra in auzament da paja da 2 fin 2,5%. Surtut dunnas e collavuraturs da blers onns duajan survegnir dapli paja. Il schlantsch economic duaja vegnir duvrà per ina repartiziun da gudogn pli gista.
RR novitads 12:00