Siglir tar il cuntegn
Cussegliera federala Eveline Widmer Schlumpf
Legenda: La ministra da finanzas svizra, Eveline Widmer Schlumpf, po esser cuntenta cun il cumpromiss. Keystone

Svizra Parlament è perina davart la gulivaziun da finanzas

Las duas chombras parlamentaras federalas èn sa cunvegnidas sin las contribuziuns dals chantuns per la gulivaziun da finanzas ils onns 2016 fin il 2019. Il Cussegl naziunal ha approvà il cumpromiss dal Cussegl dals chantuns. Ils chantuns donaturs duain vegnir distgargiads mintg'onn per 67 milliuns.

La summa da basa per la gulivaziun da resursas duai vegnir sbassà sin 165 milliuns francs per onn. La confederaziun vegn uschia distgargiada per 98 milliuns francs.

Regenzas chantunalas vulan schliaziun armonica

Il cumpromiss vegn da la conferenza da las regenzas dals chantuns. En vista da las frontas diras tranter ils chantuns che dattan ed ils chantuns che survegnan ha la conferenza tschertgà in cumpromiss armonic. Fatg strada al cumpromiss han ils chantuns Vad e Basilea-Citad. La decisiun è crudada cun 107 cunter 78 vuschs tar 3 abstenziuns. Suenter ch'il Cussegl naziunal ha dà suenter, è il cumbat per las contribuziuns da la gulivaziun da finanzas il mument a fin.

RR novitads 17:00

Artitgels legids il pli savens