- La cussegliera dals chantuns da l'Argovia Pascale Bruderer Wyss (PS) na candidescha betg l'atun 2019 per in'ulteriura perioda d'uffizi.
- La politicra da 40 onns tschertgia ina nova sfida.
- Il 2002 è Bruderer vegnida elegida sco la pli giuvna cussegliera naziunala da lez temp.
Da las elecziuns parlamentaras dal 2019 na vegn la cussegliera dals chantuns da l'Argovia Pascale Bruderer betg pli a candidar. Quai ha la politicra da 40 onns communitgà gievgia saira al di da partida da la Partida socialdemocratica a Spreitenbach. Ella veglia s'orientar da nov, uschia sia argumentaziun.
Carriera exemplarica
L'onn 2002 era Bruderer succedida a Hans Zbinden ch'era sa retratg. Da lez temp è ella stada la pli giuvna cussegliera naziunala. Quai en la vegliadetgna da 24 onns. En sia carriera ha Bruderer occupà il pli aut post en la politica svizra. Il 2009 è ella numnadamain stada presidenta dal Cussegl naziunal.
L'onn 2011 è Bruderer vegnida elegida en l'emprim scrutini sco cussegliera dals chantuns da l'Argovia.
Futur intschert
Tge exact ch'ella vegnia a far suenter la fin da la perioda da legislatura, na sappia ella er anc betg dir. In ulteriur uffizi politic ha ella però sclaus explicitamain.
RR novitads 21:00