Siglir tar il cuntegn

Header

Vaccinaziun
Legenda: Passa in milliun persunas en Svizra èn gia vaccinadas. Keystone
cuntegn

Svizra Passa in milliun persunas èn vaccinadas

Uss èn passa in milliun persunas en Svizra vaccinadas cumplainamain. Quai mussan las cifras che l'Uffizi federal da sanadad ha publitgà il venderdi.

Uschia ha circa mintga novavel Svizzer u Svizra, u 11,7% da la populaziun, gia survegnì duas dosas da vaccin. Bunamain in'ulteriur milliun ha survegnì in'emprima vaccinaziun.

En media fan ils centers da vaccinar en Svizra, mintga di enturn 53'000 vaccinaziuns. Il tempo è creschì per 4%.

Ina maioritad vul la vaccinaziun

Bunamain 3 da 4 persunas en Svizra, numnadamain 73%, vulan sa laschar vaccinar cunter Covid-19. Quai resulta d'in'enquista publitgada en la gasetta «Schweiz am Wochenende». La prontadad da sa laschar vaccinar creschia a moda rasanta, vegn cità il co-mainaproject Marcel Zbinden da la Scol'auta da Lucerna.

Tenor l'enquista n'èn 15% da la populaziun anc betg sa decidids e 12% èn cunter la vaccinaziun. L'institut per communicaziun e marketing da la Scol'auta Lucerna ha fatg l'enquista cun passa 1'000 persunas tranter ils 28 d'avrigl ed ils 4 da matg.

Effects secundars èn sco spetgads

Entant mussan las evaluaziuns en Svizra, ch'ils effects secundars suenter ina vaccinaziun da Covid-19 èn en il rom dals studis e da las indicaziuns agiuntadas. A questa conclusiun vegn Swissmedic suenter avair evaluà radund 2'000 annunzias d'effects secundars.

Pertutgadas da quels sajan en spezial dunnas e persunas pli veglias. Tar 64% dals cas eran ils pli blers betg gravants suenter la vaccinaziun cun dosas da Pfizer/Biontech e Moderna. Tar 36% eran ils effects gravants, scriva Swissmedic.

Pfizer dumonda per vaccinar giuvenils

Er giuvenils da 12 fin 15 onns duain vegnir vaccinads en Svizra cun dosas da Pfizer/Biontech. Il producent american Pfizer ha dumandà la lubientscha per il vaccin «Comirnaty». Quai ha communitgà Swissmedic.

L'institut da medicaments federal examineschia uss la dumonda en ina procedura rullanta. Il med «Comirnaty» è lubì en Svizra dapi il december per giuvenils davent da 16 onns. La fin d'avrigl ha Swissmedic lubì al concern Novartis d'emplenir giu e da pachetar quest vaccin.

RTR Novitads 18:00

Artitgels legids il pli savens

Scrollar a sanestra Scrollar a dretga