-
Bild 1 von 15Legenda: Annina Schmid, Markus Graber, Curdin Fliri e Dominik Rupf tschertgan selvaschina. RTR
-
Bild 2 von 15Legenda: L’um da tun sa prepara per la scena cun il guardiaselvaschina Daniel Bundi. RTR
-
Bild 3 von 15Legenda: Ils umens da camera en plain’acziun. RTR
-
Bild 4 von 15Legenda: Igl è bellezia sin bunamain 2000 meters en la Val Medel. RTR
-
Bild 5 von 15Legenda: I vegn lavurà mordio fin ch’ils chalzers da la moderatura brischan... u fin ch’ella perda las solas! RTR
-
Bild 6 von 15Legenda: In di da lavur cun bell’aura per la squadra RTR. RTR
-
Bild 7 von 15Legenda: ...però era cun temperaturas fraidas en plaina stad. RTR
-
Bild 8 von 15Legenda: In lieu nunusità per far la schminca la damaun marvegl: Maria Victoria Haas ha ina vista fantastica sin l’Engiadina Bassa. RTR
-
Bild 9 von 15Legenda: RTR visita biffels da l’aua a Ftan che vegnan pupragnads dalla moderatura Maria Victoria Haas… RTR
-
Bild 10 von 15Legenda: ...e dal redactur Curdin Fliri. RTR
-
Bild 11 von 15Legenda: A Tschlin vegni fatg chaschiel cun Peter Mair… RTR
-
Bild 12 von 15Legenda: … ed a Guarda in cuntè cun Thomas Lampert. RTR
-
Bild 13 von 15Legenda: Entant ch’il protagonist vegn fatg bel… RTR
-
Bild 14 von 15Legenda: ...vesan ins tar la moderatura ils fastizs da la lavur en fuschina. RTR
-
Bild 15 von 15Legenda: Herbert Jochum, Markus Graber, Laura Bärtsch, Curdin Fliri, Dominik Rupf e Maria Victoria Haas. RTR
A chaschun da la 70avla ediziun dal Festival da film a Locarno che cumenza ils 2 d'avust, ha la moderatura tessinaisa Clarissa Tami envidà ses collegas a Locarno. Sco gia ils ultims dus onns portan ils quatter moderaturs danovamain cun els istorgias interessantas da lur regiun.
Els suondan ils fastizs da la mort spectaculara d'in detectiv renumà, vegnan a savair anecdotas interessantas davart il Festival da film da Locarno, visitan in construider d'instruments passiunà che fa liras a roda ed emprendan da far in cuntè tar in fravi.
Tranter chamutschs, Uorsin e la Curt da l'uvestg
Maria Victoria Haas inscuntra per l'emprima giada in animal nunusità en l'Engiadina: il biffel da l'aua. Quests animals imposants èn charins e mirveglius. Ella emprenda da far mozzarella cun lur latg. Il vitg da Guarda è renumà pervia d'Uorsin, il protagonist da l'enconuschent cudesch d'uffants. Guarda ha dentant er ina fravgia tradiziunala. Là dastga Maria Victoria Haas far ses agen cuntè cun agid dal fravi.
Evlas, chamutschs e tschiervs vesa ella en la Val Medel, nua ch'ella accumpogna in guardiaselvaschina e vegn era confruntada cun il destin d'in vadè-tschierv ch'è naschì dacurt. En la Curt da l'uvestg da Cuira visita Maria Victoria Haas ina giuvna archeologa e gida ella a chavar. Tgi sa, sch’ella chatta in stgazi?
Da l'artista da zutger tar il mazler
Sven Epiney visita Sara Hochuli, pastiziera ed artista da zutger, en ses café a Turitg. Ses pli grond giavisch è da pudair gidar ina giada a far questas creaziuns deliziusas e plain fantasia. En la Part Sura Bernaisa sa chatta il lieu d'acziun, nua ch'in dals pli renumads detectivs duai avair pers la vita sut circumstanzas spectacularas. Da tgi ch'i sa tracta, tradescha Sven Epiney pir en l'emissiun. Vinavant va ses viadi a Basilea tar il «Marionetten Theater» unic che fascinescha dapi passa 70 onns uffants e creschids.
En il Forum da l'istorgia svizra a Sviz visita Sven Epiney l'exposiziun davart il tema «Quai mangia la Svizra» ed admira la vitrina d'ina mazlaria cun products che vesan ora surprendentamain autentics, ma ch'èn vegnids fatgs cun stgaina da Madame Tricot. Sven Epiney vul emprender d'enconuscher l'artista extraordinaria.
L'ascensiun al Monte Generoso
Il viadi interessant tras la Svizra taliana cun Clarissa Tami As maina en lieus patgifics, tar umans passiunads cun istorgias fascinantas. Vus emprendais d'enconuscher il giuven Beltg Nico ch'è vegnì en il Tessin pervi da l'amur e che tgira cun passiun la cultura da far biera.
Clarissa ascenda il Monte Generoso che na carmala betg mo cun ses panorama impressiunant, mabain era cun la «Flur da crap» ch'ins chatta dapi curt temp si là. Ella discurra cun sprayers giuvens activs che vulan revalitar artisticamain las citads cun lur graffitis. La finala «inscuntra» Clarissa era legendas dal film che han dà ina tempra marcanta al Festival da film a Locarno.
Da Les Breuleux a Les Diablerets
Per sia ventgavla emissiun dal 1. d'avust viagia Jean-Marc Richard en accumpagnament da la schurnalista Katia Hess tras la Svizra franzosa. Ensemen mussan els quant variads e multifars che la regiun e ses abitants èn. Lur viadi cumenza a Les Breuleux tar las Tiny Houses: microchasas mobilas sin rodas ch'ins po plazzar amez la natira. Silsuenter fa il duo da moderaturs anc in'excursiun ad Aigues-Vertes, il vitg d'ina fundaziun genevrina, nua che umans cun in impediment spiertal vivan.
Alura viagian els a Les Diablerets per emprender d'enconuscher il team da «The Chalet Sessions» che s'engascha per musicistas e musicists svizzers. Suenter l'intermezzo musical en il center da las Alps vadaisas vai puspè engiu en la planira, pli precisamain a Saillon. Là inscuntran els in construider d'instruments vallesan che fa liras a roda, l'instrument ad artg ch'ils trubadurs sunavan en il temp medieval.