Il WWF aveva examinà in plant cunter la decisiun da sajettar il luf, ha dentant desistì da quel. I na dettia betg in'autra soluziun, ha l'organisaziun communitgà avant in'emna.
L'analisa da DNA ha mussà, ch'il luf ha stgarpà dapli che 50 nursas. L'avrigl ha el era attatgà nursas en il chantun Son Gagl. Cun gronda probabilitad è quai era stà il luf M75. Ina cumprova genetica manca dentant anc.
Pervia dals gronds donns tar ils animals da niz ha la Protecziun da natira, chatscha e pestga dal chantun Son Gagl dà liber da sajettar il luf. L'ordinaziun è vegnida publitgada glindesdi. Ils chantuns Grischun e Tessin han gia il 22 da mars dà liber dastgar sajettar il luf.
Il luf sa mova svelt
Davart dal luf che duai vegnir sajettà e pauc enconuschent. El para d'esser in animal ch'è bler en moviment. Il grev vid la chaussa da sajettar quest luf M75 è ses sa cuntegnair tipic d'in luf che n'è betg staziunà. Quai munta numnadamain ch'el sa mova svelt e sur grondas distanzas. L'animal è per l'emprima giada vegnì identftitgà il schaner en la Bregaglia. Sia preistorgia n'è betg enconuschenta.
RR novitads 11:00
