La Svizra s'audia tar ils pajas nua che la libertad da pressa saja il pli bain protegida, uschia l'organisaziun da schurnalists. Bler pli nauschas notas che la Svizra han suvegnì ils pajais vischins:
- la Germania è 13avla,
- l'Austria 16avla,
- il Principadi da Liechtenstein 26avel,
- la Frantscha 32avla
- l'Italia 43avla.
La rangaziun da libertad da pressa cumpiglia en tut 180 pajais. Il pli liber pon ils schurnalists lavurar en Norvegia, Finlanda e Svezia. A la cua da la rangaziun percunter èn l'Eritrea, la Corea dal Nord ed il Turkmenistan.
Situaziun en Europa sa pegiurada il pli ferm
L'Europa tutga tenor l'organisaziun «Reporters senza cunfin» tar las regiuns nua che la situaziun dals schurnalists saja sa pegiurada il pli ferm. L'organisaziun ha argumentà quai cun mazzaments da schurnalists ch'i ha dà en Slovachia ed a Malta. En Frantscha sajan schurnalists vegnids attatgads da protestants dals Jillets Jaunes, en Tschechia da forzas da segirezza dal president Milos Zeman. Sur tut en pajais cun ina regenza naziunal-populistica sveglian politichers en posiziuns autas l'odi cunter ils schurnalists. Tuttina saja l'Europa anc adina la regiun dal mund nua che schurnalists possian lavurar il pli liber e segir.
RR novitads 06:00
