Ils ultims onns è la profunditad dal profil da pneus novs sa sminuida. Ina giada avevan per exempel pneus d'enviern ina profunditad da nov millimeters. Ozendi han blers in profil da be pli set millimeters.
Cun motivs da spargn e tactica da fatschenta da l'industria n'haja quai però da far nagut. I na giaja betg per vender dapli pneus, di l'expert dal TCS, Reto Blättler.
Bler gumma, bler profil = bun «grip»?
Quai era ina giada …
I constettia che l'industria da pneus mettia pli e pli fitg sin pneus cun pli pauc profil ch'ina giada, uschia l'expert dal TCS. Ozendi na saja quai numnadamain betg pli uschia ch'in pneu cun bler gumma e profil tegnia er pli ditg.
Decisiv per la qualitad d'in pneu saja la maschaida da gumma e la structura dal profil. I na gidia nagut, sch'il pneu haja bler gumma, perdia però la gronda part gia suenter paucs kilometers. E quai saja anc savens il cas tar pneus cun bler profil, uschia Reto Blättler.
Ulteriuras infurmaziuns
Main profil – curta via da franar – ed ecologic
En ils blocs da gumma pli pitschens vegn era la via da franar pli curta. Quai munta pia, che pli pauc profil porta era insatge per la segirtad. Plinavant po l'industria er spargnar cautschuc cun ils novs pneus ed er reducir la merda che resta enavos sin via.
Cussegl da midar a partir da quatter millimeters resta
Munta quella novaziun tar ils pneus uss pia er ch'ins po isar ils pneus pli ditg? Na, di l'expert Reto Blättler. Il cussegl da midar pneus, sch'il profil è pli pitschen che quatter millimeters, restia.
Tests hajan numnadamain mussà ch'il pneus perdian bler da lur segirtad e stabilitad, sch'il profil saja pli pitschen che quatter millimeters. Tenor lescha na dastgan pneus betg avair pli pauc che 1,6 millimeters profil.
RR actualitad 07:10