RTR: Pertge na curseschan ils novs trens da Bombardier anc adina betg regularmain?
Adrian Camartin: Ils trens n’èn anc adina betg segirs avunda, i dat anc adina memia blers incaps tar ils sistems dals trens.
In problem sajan per exempel las portas. Quellas stoppian d'ina vart serrar uschè ferm ch'i schabegia nagut cura che dus trens sa cruschan en in tunnel cun mintgamai 200 km per ura. Da l'autra vart ston ellas era reagir sch'ina persuna emprova anc da schluitar viaden en il tren cura ch'ella serra. Betg che la persuna vegn blessada.
Tant las Viafiers federalas svizras sco era Bombardier han accentuà ch'i na sa tractia qua betg da problems cun la construcziun, mabain da problems da la software. D'eliminar quels problems dovri temps, els sajan intensiv vid la lavur ed emprovian communablamain da chattar uschè spert sco pussaivel ina schliaziun.
Ussa s'occupa era la politica federala cun quels trens che fan problems. Oz ha la Cumissiun da traffic dal Cussegl naziunal cità il schef da las Viafiers federalas, Andreas Meyer, ed il responsabel da Bombardier, Laurent Troger. Cun tge resultat?
Las Viafiers federalas e Bombardier han preschentà in rapport davart il stan actual da las lavurs ed in plan da mesiras. Prioritad haja da schliar uschè spert sco pussaivel ils problems tecnics. Lura vulan las duas interpresas intensivar la scolaziun per ils locomotivists ed il persunal da tren. Ultra da quai duai era vegnir megliurà il confort per ils clients. Cunzunt tar spertadads bassas e cura ch’il tren traversa sviaders squassa quai fitg.
La Cumissiun da traffic dal Cussegl naziunal n’è dentant anc betg cuntenta cun quellas explicaziuns e quellas mesiras. Ella ha decidì da dumandar la Cumissiun da gestiun da prender sut la marella la fatschenta. Ella duai controllar la gestiun da la cumpra e guardar ch’i na dat naginas consequenzas finanzialas per ils pajataglias.
San ins ussa tgi ch’è responsabels per il retard ed ils custs supplementars?
La presidenta da la Cumissiun da traffic dal Cussegl naziunal, la socialdemocrata Edith Graf-Litscher, na vuleva betg vegnir concreta. Prioritad haja da schliar uschè spert sco pussaivel ils problems per ch'ils trens possian vegnir mess en circulaziun. Medem tunava quai da vart dal producent Bombardier. Ils trens sajan cumplex ed i dovria temps enfin che tut funcziuneschia.
Pli concret è stà Andreas Meyer, il schef da las Viafiers federalas. Da guardar ch'il tren nov vegnia sin ils binaris, pia ch'el funcziuneschis, saja incumbensa da Bombardier.
Era sche tant las Viafiers federalas sco era Bombardier han empruvà da mussar armonia oz, cler è che la dumonda tgi che sto surprender ils custs supplementars che las Viafiers federalas han perquai ch'ellas dovran persunal supplementar e ch'i dat dapli retards perquai ch'ellas ston duvrar trens vegls, che quella dumonda da las indemnisaziuns vegn schon anc a procurar per testas cotschnas.
Quai ch'interessescha cunzunt las numerusas persunas che viageschan cul tren: Cura curseschan ils trens novs ussa regularmain?
Quai dependa tgi ch’ins dumonda. Bombardier ha ditg oz ch'els veglian furnir tut ils 62 trens novs enfin l'october da l'auter onn.
La Viafier federala è qua pli precauta cun datas. Il schef da la partiziun transport da persunas, Toni Häne, m’ha ditg che l'urari da Bombardier saja schon pulit ambizius. El guardia en il fratemp quants trens che funcziuneschian stabil e schlargia uschia pass per pass l'offerta.
RR actualitad 17:00