Il Cussegl federal ha preschentà quatter restricziuns da credits ed ha fixà tge che vegn finanzià cun ils daners. Concret sa tracti dals suandants budgets:
- In budget da realisaziun da 827 milliuns francs. Quel cumpiglia ina reserva da 215 milliuns francs che duai valair sco garanzia da deficit. Sche quels daners na tanschessan dentant betg, fiss quai la chaussa da las organisaziuns e dals chantuns che mainan tras ils gieus olimpics.
- In budget da segirtad che cumpiglia 44 milliuns francs da la Confederaziun dasper las participaziuns chantunalas.
- In budget d'infrastructura en valur da 30 milliuns francs sco sustegn finanzial per indrizs da sport da muntada naziunala. Las investiziuns en l'infrastructura da traffic èn dentant vegnidas stritgadas.
- Ed otg milliuns vegnan mess a disposiziun per la candidatura.
Quels quatter credits sto il Cussegl federal suttametter al parlament. Enfin la fin mars sa chatta il project però anc en consultaziun.
Dentant datti era cundiziuns per ils daners...
Pervia da la gronda participaziun finanziala metta la Confederaziun paisa sin surveglianza e controlla. Perquai è ina cundiziun da la Confederaziun d'esser commember da l'organisaziun da candidatura durant la fasa da dialog e candidatura. Uschia sa el integrar il pli direct ses interess en las lavurs da planisaziun. En il mument da la realisaziun na duai la Confederaziun dentant betg pli far part dal comité. La Confederaziun na saja betg l'organisatur mabain mo in sustegn.
Dumandà è in agir exemplaric
In'autra cundiziun è che las pretensiuns en connex cun la protecziun da l'ambient, cun la planisaziun dal territori e cun il svilup persistent vegnan mess enturn exemplaricamain. Ins duai s'orientar a la strategia naziunala «svilup persistent» ed a las finamiras da las Naziuns Unidas fixadas en l'«Agenda 2030».
In'autra pretensiun è ch'era ils chantuns e las vischnancas pertutgadas sa participeschan considerablamain a la finanziaziun.
RR novitads 16:00