L'iniziativa haja chattà dapli accoglientscha tar la populaziun che quai ch'ins haja spetgà, communitgeschan ils iniziants. Quai valiteschan els sco signal ferm che la populaziun veglia che la neutralitad stoppia restar vinavant centrala en la politica da l'exteriur, la politica da l'intern e la politica da segirezza.
Naginas commembranzas ad allianzas
Concret prescriva l'iniziativa che la Svizra na dastga betg entrar en in'allianza militara ubain da defensiun. Pia la commembranza fiss scumandada – però fiss la collavuraziun cun talas allianzas legitima en il cas che la Svizra vegniss attatgada directamain.
Buns servetschs enstagl da sancziuns
Era sancziuns vers terzs na duai la Svizra da principi betg pli purtar. Suletta excepziun: Sche la Svizra fiss obligada da far quai essend en las Naziuns Unidas. Sper quai vul l'iniziativa era obligar la Svizra da porscher ses uschènumnads «buns servetschs» ad auters. Pia porscher plattafurmas e tractativas per intermediar en cunflicts.