L'uniun è vegnida fundada l'onn 1947 en il Muotatal sut il num «Katholischer Meteorologen-Verein-Innerschwyz». Motiv per la fundaziun da l’uniun è stada la derasaziun dal radio e la tema, ch'il «mirar ora l’aura» perdi uschia l’impurtanza. Sin il pli tard cura che las prognosas èn vegnidas mussadas en la televisiun, è questa tema sa verifitgada
Dapli sur dals profets da l'aura datti qua.
Propi tuc la noda ha nagin dals Muotataler Wetterschmöcker, ma fitg datiers è Alois Holdener cun sia prognosa per l’avrigl. El ha gia previs l’october passà che la primavaira s’annunzia baud, ch’ella vegn dentant puspè stgatschada da la naiv.
Er ses cumpogn Karl Hediger che porta il surnum «Naturmensch» ha annunzià il temp agreabel e primavaun mez avrigl, sia previsiun chala dentant cun la data dals 20 d’avrigl, pia gist avant ch’ì ha dà l’emprima schelira.
Empremas prognosas per la stad
Il pli nov tranter las retschas dals profets da l’aura dal Muotatal è Roman Ulrich. El è commember pir dapi in onn. E per l’avrigl 2017 ha el simplamain previs grondas midadas da temperatura e «Niederschlag». Quai po esser plievgia ubain naiv.
Questa sera, ils 28 d’avrigl 2017, ha lieu l’emprima radunanza generala da quest onn da l’uniun meteorologica dal chantun Schwyz, uschia il num uffizial dals profets da l’aura dal Muotatal. Lura vegnan ils «Wetterschmöcker» ad annunziar las prognosas per la stad e l’atun 2017.
RR actualitad 17:00