- ina scola da la Caritas
- chasas ed in project d'agricultura da la Helvetas
- in center da sanadad e per la protecziun d'uffants da Terre des Hommes
- in center da scolaziun per miradurs da la Crusch Cotschna e da Swisscontact
- ed in project da reconstrucziun da Medair
Tut quai èn projects che la Chadaina da Fortuna ha finanzià cun ina part da las 1,7 milliardas francs che l'organisaziun ha rimnà ils ultims 70 onns.
Pervia dal giubileum datti in quiz (guarda chaschettas a la dretga) cun in premi attractiv: In viadi da circa 10 dis en il Nepal nua ch'il victur u la victura ha tranter auter la pussaivladad da visitar ils project d'agid numnads sura.
Interessà?
Betg in viadi da luxus mabain in'experientscha
Quai di Claudia Cathomen, la vusch rumantscha da la Chadaina da Fortuna, che ha sezza gia visità plirs projects. I saja da quintar cun lungs viadis en jeeps en ils quals ch'ins vegnia scurlattà atras. Plinavant stoppian ins tut tenor ir lunsch a pe per cuntanscher ils projects e durmir en tenda u en alloschis fitg simpels.
Il luxus vi da quest viadi è da pudair vesair insatge ch'ins na po betg cudeschar tar in biro da viadi.
RR actualitad 11:00