La refurma da rentas ha surmuntà l'ultim obstachel en il parlament. Omaduas chombras han approvà la proposta en la votaziun finala venderdi. La fin da settember vegn il pievel svizzer lura a vuschar davart questa refurma da las rentas. I dovra ina decisiun dal pievel damai che l'augment da la taglia sin la plivalur pretenda ina midada da la constituziun.
Il menu da la refurma da rentas
- Dunnas duain lavurar fin 65.
- Novs pensiunaris duain survegnir 70 francs dapli AVS.
- Per finanziar l'AVS duai la taglia sin la plivalur vegnida augmentada per 0,6%.
- Quant che duai vegnir pajà or da la cassa da pensiun mintga mais. Il mument è quai 6,8%. En futur duain quai anc esser 6%.
Il Cussegl naziunal era decisiv
La decisiun è crudada: cun 101:91 vuschs tar 4 abstenziuns: Il Cussegl naziunal ha ditg gea a la refurma da rentas. La decisiun è dentant stada fitg stretga.
I ha dà precis tantas vuschs sco ch'i ha duvrà: ina vusch pli pauc e la refurma fiss stada in cas per per il chanaster da palpiri. Normalmain sa po far ina prognosa dal resultat. Dentant tar la refurma na saveva nagin tge che capita.
Ord la debatta dal Cussegl naziunal
Las posiziuns en il cussegl naziunal èn stadas cleras: Dretga PPS e PLD èn cunter la refurma e l'allianza PS, PCD, PVL e Verds èn per la refurma. Dentant datti en diversas partidas persunas che na vegnan a vuschar tenor lingia da partida. Tant pli gronda è la tensiun.
Ruth Humbel (PCD / AG) ha anc ina giada declerà las differenzas tranter il Cussegl naziunal ed il Cussegl dals chantuns e la proposta da cumpromiss. Ella ha fatg endament als parlamentaris che trais refurmas da rentas hajan gia fatg naufragi ed i saja ussa temp per ina nova.
Mo cun in GEA pudais vus dar la schanza a la populaziun da votar davart las rentas!
Thomas de Courten (PPS / BL) ha pledà per quels che vulan refusar il cumpromiss. El na craja betg ch’il pievel acceptass la refurma da rentas en ina votaziun ed el ha crititgà il vi e na dal parlament.
Quai n’è nagin cumpromiss, quai è in dictat!
Ord la debatta dal Cussegl dals chantuns
Era sche las posiziuns en il Cussegl dals chantuns eran cleras, han adversaris ed aderents anc ina giada preschentà lur arguments. Konrad Graber (PCD) ha preschentà il cumpromiss da la conferenza d'intermediaziun. Quel correspunda a la proposta dal Cussegl dals chantuns. Encunter questa proposta che cuntegna in augment da la renta da l’AVS da 70 francs per persunas che vegnan pensiunadas da nov – ha pledà Alex Kuprecht (PPS).
Berset ha tremblà
Avant la votaziun decisiva en las duas chombras, ha il cusseglier federal Alain Berset ha anc ina giada empruvà da far attent a l’impurtanza da la fatschenta. En ses pled ha el er exprimì sia chapientscha che las emoziuns hajan cuntanschì in punct culminant, suenter las lungas debattas en il parlament. Quai saja be uman, la finala saja la refurma impurtanta per l’entira Svizra.
I n’è betg il temp per discutar differenzas. Oz èsi simplamain da dir gea u na.
In ping-pong nunditg
Dapi 4 onns è la refurma da rentas vegnida tractada a Berna. Las duas chombras n'èn betg vegnidas perina fin a la fin. Igl è stà in cumbat per cumpromiss. Uschia è la refurma siglida dad ina chombra en l’autra. I ha dà bleras propostas differentas. Be cun pass pitschens èn il Cussegl naziunal ed il Cussegl dals chantuns vegnids encunter in a l’auter. E pir uss, l’ultim mument pussaivel han las duas chombras chattà in cumpromiss.
I sa tracta da la terza refurma. Dus ulteriuras refurmas eran gia stadas en discussiun a Berna. Quellas èn dentant idas da l’aua giu. La terza ha la finala surmuntà las differenzas.
RR novitads 10:00+
