La Svizra ha pajà enavos ina emprima rata da daners tunesians bloccads. I sa tracta da 250'000 francs ch'in nev da l'anteriur dictatur da la Tunesia, Zine al-Abidine Ben Ali, ha transportà ord ses pajais e deponì en la Svizra.
La procura publica federala ha confermà il pajament, ella n'ha dentant fatg naginas indicaziuns, da tgi ch'ils daners èn. - En connex cun la primavaira araba il 2011 era il nev da Ben Ali fugì cun ils daners. Dapi lura ha la Svizra bloccà radund 60 milliuns francs sin contos svizzers.
