Curt e concis
- La direcziun da la SDA ha refusà tut las pretensiuns dals schurnalists
- Var 36 plazzas vegnan per gronda part desditgas fin la fin da schaner
- Ils schurnalists vulan cumbatter vinavant
Per redacturas e redacturs da l'agentura da novitads munta la resposta da la direcziun che la restructuraziun e reducziun cuntinuescha senza interrupziun. Plinavant na datti naginas contractivas davart ils plans da restructuraziun. La redacziun na vegn betg infurmada ordavant nua e tge plazzas che vegnan stritgadas e na survegn era nagin'invista en las pajas da la direcziun.
Schurnalists èn trumpads
Tenor il sindicat Syndicom èn ils schurnalists ordvart trumpads da la resposta. Betg mo da la direcziun, mabain er dal cussegl d'administraziun. Quel na paria numnadamain er betg da vulair far insatge encunter in'escalaziun. Sco consequenza vegnian ils schurnalista ad elavurar ulteriuras mesiras da cumbat. Quai avevan els gia communitgà en la resoluziun, elavurada durant la chauma dal mardi passà.
Emprima extrada or dal cussegl d'administraziun
Sco il sindicat scriva vinavant en sia communicaziun, haja Sandra Jean dà giu ses post en il cussegl d'administraziun da l'SDA. La directura da la gasetta vallesana Nouvelliste e da divers magazins, na possia betg ir d'accord cun la strategia dal cussegl d'administraziun.
RR novitads 06:00
