Siglir tar il cuntegn

Header

audio
La Svizra è sin glista d’inimis da la Russia
Or da Actualitad dals 09.03.2022.
laschar ir. Durada: 4 minutas 32 Secundas.
cuntegn

Svizra sin glista da la Russia «Che nus essan sin la glista vul dir che avain reagì gist»

La Russia ha mess la Svizra sin ina glista cun num «stadis nunamicabels». La gronda part da las parlamentarias ed ils parlamentaris grischuns na vesan tuttina betg in problem per la Svizra d’esser neutrala e pudair intermediar tranter l’Ucraina e la Russia.

La Russia ha mess la Svizra sin ina glista cun num «stadis nunamicabels», quai pervi che la Svizra surpiglia las sancziuns da l’UE encunter la Russia. La gronda part da las parlamentarias ed ils parlamentaris grischunas na vesan dentant nagin problem per la Svizra d’esser neutrala e pudair intermediar tranter l’Ucraina e la Russia.

Per ils parlamentaris grischuns dumandads datti anc adina la schanza per la Svizra da pudair intermediar. Uschia argumentescha Jon Pult cun il fatg che discurs han era lieu en Tirchia – in pajais commember da la NATO, ed in pajais ch'ha serra per navs da guerra russas il chanal dal Bosporus. Era ch'il president da la Frantshca Emmanuel Macron telefona regularmain cun il president Russ Wladimir Putin mussa, che sche Putin discurra anc cun in dals pajais da l’UE cun la pli blera influenza ha era la Svizra anc bunas schanzas da pudair intermediar.

Svizra resta vinavant neutrala

La Svizra resta era cun sancziuns neutrala, quai din era la cussegliera naziunala Anna Giacometti ed il cusseglier naziunal Martin Candinas. Els na vesan nagin problem per pudair intermediar sche las partidas da conflict dumondan. Anna Giacometti manegia era sche la Svizra è arrivada sin la glista russa, lura ha la Svizra fatg tut correct. I fiss stà fauss da betg sustegnair las sancziuns suenter che la Russia violescha fermamain il dretg internaziunal.

Pli critic envers las sancziuns è la cussegliera naziunala Magdalena Martullo. Era ella manegia ch'i resta ina schanza per pudair intermediar, dentant saja quella daventada in toc pli pitschna cun sancziunar la Russia. D’esser uss sin la glista da la Russia vegn tenor ella ad avair consequenzas sche la Russia avess da decider da betg pli exportar gas a quels pajais sin la glista. Dentant na craja Martullo betg ch'i vegnia a dar consequenzas economicas pli grevas, causa che la Russia haja ina economia debla.

Per Jon Pult è la glista da la Russia plitost in instrument da squitsch. El suppona che la glista è plitost era in element per procurar per tensiuns en la politica svizra. Dentant na tema el naginas consequenzas intermediaras da la glista.

La glista è lunga

Sin la glista sa chattan dasper la Svizra tranter auter era ils stadis da l’Uniun Europeica, la Gronda Britannia, il Giapun, Canada ed ils Stadis Unids. Quai sco consequenza da las sancziuns encunter la Russia. Entant na sa dentant ni il Departament ferderal d'affars externs ni il secretari da stadi per l’economia tge consequenzas ch'igl ha d’esser sin la glista. Ins è vid il sclerir, hai num sin dumonda.

RTR actualitad 17:00

Artitgels legids il pli savens