Legenda:
Ina drona en acziun tar il servetsch civil –
il chantun Appenzell Dadora ha ina da las emprimas gruppas svizras che dovran dronas per far sgols d’observaziun.
Keystone
cuntegn
Svizra - Tecnica mobila en Svizra è pronta per dronas – en sasez
Basta l’infrastructura da la telefonia mobila per laschar sgular las dronas segiramain en il spazi aviatic svizzer – quai era la dumonda che la segirezza da sgol Skyguide vuleva avair respundida. Gea, di uss in studi dal center scientific per aviaziun Aviation Research Centre Switzerland (ARCS).
Il studi vegn a la conclusiun, ch’i na dovria betg ina nova infrastructura da telefonia mobila per integrar dronas segiramain en il spazi aviatic svizzer. Quai communitgescha il center scientific ARCS la mesemna.
Per il studi sajan vegnids fatgs sgols da mesiraziuns e quels mussian ch'il barat da datas tranter dronas e purschiders da soluziuns dad U-Space saja stabil. Cun il sistem U-Space duain dronas vegnir integradas en il spazi aviatic ed en l'avegnir era esser suttamessas a la controlla dal traffic aviatic.
Il studi è vegni realisà en ina collavuraziun da l’ARCS ensemen cun la ZHAW School of Engineering, l’universitad da Son Gagl St. Gallen, da la scola politecnica federala Lausanne e da la Swisscom.
Controlla da dronas – en politica ed aria
Avrir la boxSerrar la box
Actualmain è il Cussegl federal vi da l'elavuraziun dad ina lescha per registrar dronas. Quella duai stgaffir ina basa per in traffic da dronas segir. L’incumbensa era vegnida in settember dal parlament – e quel era seguì ad ina moziun correspundenta dal cusseglier naziunal Martin Candinas (PCD/GR).
Il center da segirezza da sgol Skyguide surpiglia gia quest onn da survegliar intginas dronas cun in servetsch automatisà per reducir il privel ch'ellas collideschan cun eroplans.
