Svizra Turissem: Enavos en la natira

Auters han il sablun, la mar e las metropolas. Nus avain dentant tschiervs, chamutschs, muntanellas, plantinas e plantas, tradiziuns e spezialitads. Cun la natira vul Svizra turissem clamar ils giasts da dalunsch e damanaivel en la natira da la Svizra. Il Grischun duai profitar.

Sursiglir cuntegn supplementar

La campagna da stad 2017

  • Investiziuns (bruttas): 45,5 milliuns francs
  • Media Relations: 60 conferenzas da pressa, 850 schurnalists envidads
  • Reclama: repartgì 11 milliuns broschuras en l'entir mund
  • Marketing online: 15 milliuns visitaders sin MySwitzerland.com e trais milliuns fans e followers en las raits socialas

Per la campagna da stad impunda l'organisaziun da turissem svizra radund 45 milliuns francs, scriva Svizra Turissem. Tranter auter vegnia investì en passa 700 eveniments d'aventura e novas plattafurmas online.

Perscrutar la natira - quai saja il criteri che vegnia numnà il pli savens sch'ins dumonda ils giasts che visitan la Svizra, scriva Svizra Turissem. Per quest motiv ha l'organisaziun elegì per la campagna da stad 2017 il motto «La natira vul enavos tai».

L’idea da vender la Svizra sco lieu ch'è datiers a la natira n'è betg insatge nov. Dentant co las offertas vegnan preschentadas è nov. Per levgiar quest «sfunsar» en la natira ha l'organisaziun sviluppà differentas plattafurmas online. Questas servan sco guids da viadi per tut ils giasts esters ed indigens che vulan scuvrir questa stad la Svizra. Turissem d'aventura saja in trend actual, di Jürg Schmid, il directur da Svizra Turissem. Quai saja er ina schanza per far pli enconuschent la savida regiunala svizra en l'entir mund.

«  Il turissem da stad è ina schanza per la Svizra. Plitost ussa che ils envierns vegnan adina pli curts e la naiv manca. In quel sa sto investir. »

Jürg Schmid
directur Svizra Turissem

Tranter auter propona Svizra Turissem sin sia pagina d'internet 130 programs per observar selvaschina cun guids professiunals. Ultra da quai stattan a disposiziun passa 200 tegias d'alp ch'ins po prender a fit.

Suenter divers onns nua che il turissem da stad ha patì, per exempel sut il ferm franc svizzer, duai quest onn dar in lev plus. Ins spetga in plus dad 1-2% sche l’aura è da la vart dals turistichers.

Il clip da reclama da Svizra Turissem

RR novitads 10:00