Siglir tar il cuntegn
Inhalt

Svizra Svizra Turissem rinforza il marketing

Svizra Turissem intensivescha il marketing per far frunt a la fermezza dal franc, quai ha l'organisaziun da vacanzas svizra ditg a la conferenza da medias annuala.

Jürg Schmid, il directur da Svizra Turissen durant la conferenza da medias.
Legenda: Cun ina campagna da marketing pli gronda vul Svizra Turissem far frunt al ferm franc svizzer. Keystone

La campagna «inamurà da la Svizra» duai gidar a stabilisar il martgà da chasa e custia radund 4 milliuns francs.

Svizra Turissem vul dentant era rinforzar la reclama en ils martgads da l’Europa, en spezial en ils pajais dal nord. Cun agid da la societad aviatica Swiss, che porscha sgols directs, vul l'organisaziun era attrair dapli giasts ord ils stadis baltics, dal Balcan e da la Tirchia.

Prognosas per ils proxims 2 onns

L’offensiva da reclama è necessaria sch'ins dà in sguard sin la prognosa per ils proxims dus onns. Uschia fa Svizra Turissem quint cun in minus da pernottaziuns da fin 10% en regiuns alpinas. Quai surtut pervia da giasts europeics che vegnan a mancar il avegnir.

Giasts tudestgs per exempel reageschian fitg sensibel sin augments da pretschs. Per il directur da Svizra Turissem, Jürg Schmid, èsi perquai per il mument difficil fin betg pussaivel da gudagnar enavos il giast tudestg.

Recepts per il turissem svizzer

Dasper la campagna da reclama dettia anc auters recepts per il turissem svizzer. Uschia stoppian ils differents purschiders lavurar anc pli stretg ensemen, ins stoppia reducir ils custs e la politica stoppia porscher meglras cundiziuns da basa, uschia Jürg Schmid.

270 milliuns da la Confederaziun

L'organisaziun da marketing Svizra Turissem vegn finanziada da la Confederaziun. Il Cussegl federal propona da pajar 220 milliuns francs a l'organisaziun per ils onns 2016-19. Jürg Schmid pretenda però 50 milliuns dapli. Senza quels ulteriurs milliuns na saja ina campagna cumplessiva a pli lunga vista per far frunt als effects dal ferm franc svizzer betg da finanziar, argumentescha el. L'ultim pled en chapitel ha il parlament, quel sto deliberar la contribuziun per Svizra Turissem.

RR novitads 11:00/17:00