Siglir tar il cuntegn

Header

video
Baume-Schneider: Nivel da paja en Svizra vegn protegì
Or da News-Clip dals 15.12.2023.
laschar ir. Durada: 30 Secundas.
cuntegn

Svizra – UE Cussegl federal ha deliberà sboz per nov mandat da tractativas

Il Cussegl federal ha deliberà venderdi il sboz per in mandat da tractativas cun l'Uniun Europeica. Cumenzar duain las tractativas uschespert ch'il mandat è definitiv suenter la consultaziun dal parlament e dals chantuns.

Il sboz cuntegn las directivas tenor quellas che la Svizra vegn a s'orientar durant las tractativas. Pia in mussavia per ils proxims discurs cun Brüssel. Quel ha il Cussegl federal decedì suenter plirs discurs da sondagi cun l'uniun europeica. Il sboz basa sin las valurs directivas da chantun ch'il Cussegl federal ha approvà ils 21 da zercladur passà sco er sin ils resultats dals discurs da sondagi cun l'UE e sin la lavur cun ils partenaris socials ed economics da la Svizra.

audio
Las tractativas da la Svizra e l’Uniun europeica - discurs cun Anna Selina Quinter
ord Actualitad dals 15.12.2023. Maletg: RTR
laschar ir. Durada: 3 minutas 37 Secundas.

Electricitad e segirezza da victualias 

L'element central dal pachet è tenor indicaziuns dal EDA l'access senza obstachels al martgà intern da l'UE. Persuenter duain tranter auter novas cunvegnas en ils secturs electricitad e segirezza da victualias vegnir fatgas. Uschia duai vegnir garantì a la Svizra in access durabel a ses pli grond martgà d'export.

Chaussas instituziunalas vul il Cussegl federal reglar entaifer las cunvegnas davart il martgà intern. Ordinaziuns davart agids statals perencunter duain vegnir scrittas en l'aria, en il traffic terrester ed en la cunvegna davart l'electricitad.

Daners da perscrutaziun da l'UE per la Svizra

Il pachet cuntegna tenor indicaziuns da l'EDA era ina cunvegna davart la collavuraziun en il sectur da sanadad e la participaziun sistematica als programs da l'UE, surtut en ils secturs furmaziun e perscrutaziun. Tranter quels èn Horizon Europe sco era il program da barat Erasmus+.

video
Parmelin: Proxims pass per Horizon Europe ed Erasmus Plus
Or da News-Clip dals 15.12.2023.
laschar ir. Durada: 25 Secundas.

Plinavant ha il Cussegl federal fixà la cumposiziun da la delegaziun svizra che duai contractar cun l'UE davart ils differents secturs dal pachet. Il schef-negoziader saja pia Patric Franzen. El è manader da la partiziun Europa dal EDA e substitut dal secretari statal.

Sia incumbensa vegn el a surpigliar ensemen cun las manadras ed ils manaders da las tractativas dals departaments per ils differents secturs dal pachet.

video
Delegaziun da negoziaders e negoziadras maina Patric Franzen, schef da la partiziun Europa da l'EDA
Or da News-Clip dals 15.12.2023.
laschar ir. Durada: 38 Secundas.

En in proxim pass vegn il EDA ussa a far consultaziuns davart quest sboz da mandat tar las cumissiuns per la politica exteriura dal parlament e tar ils chantuns. Ils partenaris economics e socials vegnan medemamain envidads da prender posiziun.

Chantuns e PLD beneventan questa decisiun dal Cussegl federal

Cun l'avertura da la consultaziun per il sboz dal mandat da tractativas cun l'uniun europeica saja vegnì fatg in pass impurtant, sco la Conferenza da las regenzas chantunalas scriva en ina communicaziun. Las regenzas chantunalas beneventan quest conclus. En ina radunanza plenara extraordinaria ils 2 da favrer 2024 vegnan ils chantuns a deliberar ina posiziun cuminaivla davart il sboz.

En il fratemp ha la PLD numnà il sboz preschentà dal Cussegl federal per sviluppar vinavant las relaziuns bilateralas cun la UE sco «pass impurtant en la dretga direcziun».

RTR novitads 15:00

Artitgels legids il pli savens