Ina brev al Cussegl federal ch'era SRF ha en possess, mussa dentant ch'ils partenaris socials restan critics. Els na sustegnan betg la cunvegna actuala. Senza lur sustegn è questa cunvegna da basa dentant tant sco morta, scriva SRF.
Protecziun da las pajas sco pli grond quità
«La cunvegna en sia furma sco quai ch'ella è ussa, n'ha nagina schanza da survegnir ina maioritad», di Daniel Lampart da l'Uniun sindicala svizra (SGB). Ils partenaris socials crititgeschan unisono che la protecziun da las pajas svizras è insuffizient, sche la cunvegna da basa vegniss suttascritta en sia furma dad oz.
La cunvegna da basa periclitescha las pajas, ella sutminescha nossa protecziun da pajas.
«I dovra ussa novas contractivas cun l'UE, che duain meglierar a moda fundamentala la cunvegna da basa», di Lampart.
L'Uniun svizra da las patrunas e dals patruns e l'Uniun svizra d'artisanadi e mastergn vulan vinavant ch'i vegn fermà en la cunvegna, che tschertas parts da la directiva per burgais da l'UE na valan betg per la Svizra. Patrunas e patruns teman numnadamain che burgais da l'UE ch'èn dischoccupads pudessan lura retrair prestaziuns socialas en Svizra, senza avair lavurà qua.
Fazit dals partenaris socials
Reacziun da l'UE intscherta
Ils sindicats e l'Uniun d'artisanadi e mastergn pretendan vinavant dal Cussegl federal dad er contractar da nov en chaussa mediaziun da dispitas. Els vulan evitar che la Svizra sto surpigliar quasi automaticamain novas leschas da l'UE (recepziun dal dretg dinamica) e ch'il tribunal europeic avess en cas da dispita l'ultim pled.
Els proponan da sviluppar ina nova cunvegna da basa – sumeglianta a quella dal ex-diplomat Michael Ambühl. Ma igl è intschert sche l'UE suttascriviss in contract che porta dapli avantatgs per la Svizra.
En lur brev scrivan ils partenaris socials vinavant, che la cunvegna da basa chattass sustegn en Svizra sche dumondas da la libra circulaziun da persunas vegnissan exclusas cumplettamain da quella. Quai pudess dentant betg vegnir en dumonda per l'UE.
Cussegl federal davant mantun da stgaglias
Il resultat dal discurs tranter ils partenaris socials munta ch'il Cussegl federal stat davant in mantun da stgaglias. Senza il sustegn dals partenaris socials faschess ina cunvegna cun l'UE naufragi il pli tard cura che la cunvegna vegniss en consultaziun en il parlament svizzer. Oriund aveva il Cussegl federal vulì finir la cunvegna anc avant il Brexit. Betg cler è co l'UE vegn a reagir sch'il Cussegl federal declerass il naufragi da la cunvegna da basa.
