Siglir tar il cuntegn

Header

cuntegn

Svizra – Uniun europeica Mandat per tractativas duai esser sin maisa la fin da zercladur

Las tractativas tranter la Svizra e l’UE davart lur relaziuns futuras survegnan schlantsch. Fin la fin da zercladur vul il Cussegl federal elavurar las lavurs directivas d’in mandat da negoziar, sco ch'el ha communitgà. I giaja uss per elavurar schliaziuns per las dumondas che sajan anc avertas.

La dinamica dals discurs tanter l'Uniun europeica e la Svizra saja positiva, scriva il Cussegl federal. Quai suenter che la relaziun ha patì, perquai che la Svizra ha decis il 2021 da disdir las tractativas per ina cunvegna da basa. Dapi lura han gì lieu 8 discurs da sondagi e 19 discurs tecnics tranter las delegiaziuns da la Svizra e l'UE. Quels discurs han sco finamira da tutgar il puls. A maun da quels duai ussa vegnir elavurà ina basa per pudair ir en tractativas cun l'Uniun europeica.

Fin la fin da zercladur duai uschia era vegnir debattà intern sur da divers puncts – per exempel sur da la protecziun da pajas, e quai ensemen cun ils partenaris socials, per chattar autras soluziuns. L'UE vul numnadamain che la Svizra vegn encunter en chaussa per insumma tractar sur dad ina l'autra soluziun per la relaziun.

En pli beneventia il Cussegl federal la posiziun unanima dals chantuns areguard la politica europeica. Il dialog cun ils chantuns haja pussibilità da chattar soluziuns per subsidis e l'immigraziun. Questas propostas giajan a prà cun l'idea da l'Uniun europeica.

Reacziuns da las partidas

Schoccà dals plans dal Cussegl federal sa mussa Thomas Aeschi, il schef da fracziun da la Partida populara. Quai na saja nagut auter che da sepulir ils dretgs dal pievel, ha ditg Aeschi a l'agentura da novitads Keystone-SDA. Il co-president da la PS, Cédric Wermuth beneventa ils plans dal Cussegl federal. El fa dentant er attent a dumondas avertas, sco per exempel a la protecziun da las pajas. Per ils Verd-liberals fa il Cussegl federal in pass en la dretga direcziun – il tempo saja dentant memia plaun. Quai ha scrit il president da la partida, Jürg Grossen, sin Twitter. Pli optimistic è er il president dals Verds, Balthasar Glättli. I saja dentant anc memia baud per emblidar ils plans per ina «Iniziativa Europa». Las ulteriuras partidas grondas n’èn anc betg s’exprimidas en chaussa.

RTR novitads 15:00

Artitgels legids il pli savens