Siglir tar il cuntegn
Inhalt

Svizra Svizra vinavant attractiva per spezialists

La Svizra ha ina posiziun da leader sin ils secturs attractivitad e disponibladad da talents.

In spezialist davos in instrument tecnic.
Legenda: La Svizra resta attractiva per spezialists. Keystone

La Svizra è anc adina numer 1, quai che pertutga recrutar spezialists ed occupar els a lung temp. Quai resulta d'in studi dal center per la cumpetitivitad globala da la scol'auta d'economia IMD a Losanna. Il studi ha examinà l'abilitad da differents pajais da promover talents, attrair quels e da tegnair ils pli capabels. La Svizra ha ina posiziun da leader en ils secturs attractivitad e disponibladad da talents. Ils criteris per giuditgar l'attractivitad èn tranter auter il nivel da paja sco er la qualitad ed ils custs da viver.

Bunas notas per furmaziun d'emprendists

En general survegn la Svizra da l'IMD fitg bunas notas per la furmaziun d'emprendists e la scolaziun en las interpresas. Sco pli pauc positiv valitescha il studi las expensas publicas per scolaziun sco er il dumber d'emprendists pro maister d'emprendissadi. Ed er quai che pertutga il criteri investiziun e svilup dal pool da talents, arriva la Svizra be sin plaz 5.

Sin plaz 2 da la rangaziun suonda sco l'onn passà il Danemarc. Sin ils proxims plazs èn ils pajais: Austria, Finlanda, Pajais Bass, Norvegia, Germania, Svezia e Luxemburg. Ils Stadis Unids suondan pir sin plaz 16 e la China sin plaz 40 da 63 pajais.

RR novitads 06:00