Tar ina votaziun dal pievel fissan oz 57% per ina candidatura. Oravant tut persunas pli giuvnas e persunas da la Svizra franzosa fissan persuenter. Trais da quatter persunas dumandadas vesessan ils gieus olimpics d’enviern sco in effect positiv per l’industria da turissem svizra. Quai che pertutga las schanzas da la Svizra tar ina tala candidatura vesan ils pli blers nagins problems. Dus da trais dumandads manegian che l’infrastructura che saja gia avant maun fetschia la Svizra sco in candidat ideal. Passa la mesadad è dentant era da l'idea ch'ils custs fissan pli auts ch'il niz.
Candidatura decentrala en la rola da favurit
Per ils gieus olimpics d’enviern 2026 èn vegnidas inoltradas a Swiss Olympic tschintg candidaturas. Trais da quellas èn projects regiunals e duas candidaturas vulan che las concurrenzas vegnan partidas sur l’entira Svizra.
59% dals dumandads fiss per ina candidatura decentrala. Da las candidaturas regiunals vegn il Grischun favurisà.
Ils projects duain ussa vegnir discutads da rudent fin l’october. La votaziun dal pievel duai succeder la primavaira 2017.
1928 e 1948 a San Murezzan
En Svizra è vegnì organisà fin oz be duas giadas gieus olimpics d’enviern, quai il 1928 ed il 1948 mintgamai a San Murezzan. La davosa giada èn ina candidatura ida da l’aua giu a l’ura il mars 2013. Lura veva il pievel ditg na cun 53%.
RR novitads 12:00