Siglir tar il cuntegn
Inhalt

Svizra Svizzers han cumprà l'onn passà 10% dapli online

Cumprar online è puspè stà pli popular l'onn passà en Svizra. Per 10% èn las venditas s'augmentadas il 2017 cumpareglià cun l'onn avant. En tut han Svizras e Svizzers cumprà per 8,6 milliardas francs online.

Pachets.
Legenda: Oravant tut products d'electronica cumpra la clientella svizra online. Keystone

Lunsch sur la media, numnadamain per bunamain in quart, èn creschidas las cumpras online en l'exteriur. Da la svieuta totala èn 1,6 milliardas francs ids ad interpresas en l'exteriur. Quai annunzia la federaziun dal commerzi da spediziun – l'interpresa da retschertgas GfK e la Posta svizra.

Cumpras online vegnan anc a crescher

Cumprà online ha la clientella svizra cunzunt products d'electronica (2,01 milliardas francs), rauba da moda e chalzers (1,66 milliardas francs). En la sparta dals products d'electronica vegn cumprà in terz da la rauba betg pli en butias mabain online. E la prognosa è che cumprar online en l'exteriur vegn vinavant a crescher. Quai cunzunt en la China.

Nus quintan che quest svilup cuntinuescha fin il 2020 e vegn a purtar supplementarmain ina pressiun sin il pretsch dal martgà

RR novitads 12:00